Hreyfing - Næring - Sköpun - Leikur Hafa samband

Vináttuverkefni Barnaheilla

Í vetur munum við í Heiðarseli byrja að vinna með vináttuverkefni Barnaheilla - Save the children. Börnin á Brekku og Bakka munu taka þátt í verefninu í vetur og í morgun kom Blær til okkar ásamt öllum systkinum sínum við mikinn fögnuð nemandana. Blær er bangsi og er táknmynd vináttunnar í verkefninu. Blær minnir börnin á að gæta hvers annars vel og að vera góður félagi sem og að hjálpa við ýmis verkefni og faðma, gleðja og hugga börnin. Hver og einn nemandi sem er að vinna í verkefninu fær lítil bangsa sem táknar samfélag vináttu.

Verkefnið byggir á nýjustu rannsóknum á einelti.  Í því er unnið að því að fyrirbyggja einelti með því að móta góðan skólabrag, eiga góð samskipti og hafa jákvæð viðhorf til allra í hópnum. Þátttaka allra; barna, starfsfólks og foreldra er grundvöllur þess að vel til takist. Lögð er sérstök áhersla á að ná til þeirra barna og fullorðinna sem verða vitni að einelti án þess að bregðast við því.

Efnið byggir á ákveðinni hugmyndafræði og gildum sem skulu samofin öllu leikskólastarfinu  og er órjúfanlegur hluti þess í allri vinnu og starfi leikskóla sem vinnur með Vináttu. Gert er ráð fyrir að þátttakendur tileinki sér þessi grunngildi við vinnu og samskipti í leikskólasamfélaginu. Hugmyndafræðin endurspeglast í gildunum fjórum:

1. Umburðarlyndi
Að viðurkenna og skilja mikilvægi og gildi fjölbreytileikans og að koma fram við alla aðra af virðingu.

2. Virðing
Að viðurkenna og taka tillit til allra barnanna í hópnum, að vera öllum góður félagi og að virða mismunandi hátterni annarra.

3. Umhyggja
Að sýna öllum börnum áhuga, samkennd, samlíðan og hjálpsemi. Að hafa skilning á stöðu annarra.

4. Hugrekki
Að þora að láta til sín heyra og geta sett sér mörk. Að vera hugrakkur og góður félagi sem bregst við óréttlæti.